Marimari kom pu wenhüy,
Fachi Anthü ðewmapefin tüfachi video, Leonel Lienlaf piŋechi ülkantufe ñi ül mew. Rume ayüfin tüfachi ülkantun. Fey tüfa ta ðüŋuy feychi video mew. Ðewmaam video, nentufin Leonel Lienlaf ñi ðüŋun Zuñiga ñi chillka mew, ti að nentuyefin internet mew kay.
Ale pelon kontupaenew
fachi lifkülechi punh mew.
We nentun ñi ðüŋu
ñi konpaam ñi pülli.
Kelüntükuwchi lien
fürenmanieenew ñi að.
"Chumafun kay ŋa
nienuli küme takuwe,
chumafun ŋepey",
piwtufuy ñi piwke.
Femŋechi ta witralepan
fütra punh ta ñi að lelituam
kuyfike konha,
chew lelituwlu
feychi ñiðol nielu tachi Mapu.
Feychi mew witralepan
raŋi punh may, pu loŋko,
eymün ta wenu Mapu
umagtulelu,
eymün may.
Witrañpüramaan ñi piwke
ka ñi pewma,
pipiŋepan rel tachi pichi ko mew.
Moŋen ko ta pikefuymün,
moŋelmuan ñi pülli,
üñüm reke ta lelituan
kom fachi Mapu,
ka ðüŋuafin ta ŋürü:
"kelluen ñi rüpü mew".
Küla piwke ŋa nietuan,
fachi raŋi punh mew
pipiŋepan ŋa,
wenu Mapu lelfün pu loŋko.
Aucun commentaire:
Enregistrer un commentaire